Тры сябры-праграмісты вырашылі спалучыць у адным праекце сучасныя тэхналогіі, спартовы азарт і беларускую мову. Так з’явіўся праект MovaCup.by — онлайн-пляцоўка, на якой у хуткім часе з’явяцца онлайн-гульні, з дапамогай якіх кожны здолее праверыць уласныя веды беларускай мовы і гісторыі, распавядае «Радыё Свабода».

Чытаць далей

Змітру Ключко — 26 год. Тры гады як ён скончыў БДУІР і ад таго часу працуе вэб-распрацоўшчыкам у Мінску. Яшчэ са студэнцкіх часоў ён разам з сябрамі задумваў стварыць онлайн-гульню, у якой быў бы і футбол, і беларуская мова.

«Калі я студэнтам ездзіў да бацькоў у Баранавічы, па дарозе я меў шмат часу на свае думкі, — кажа Зміцер. — Як і большасць маіх творчых ідэй таго часу, гульню пра футбол і беларускую мову я таксама прыдумаў у цягніку».

Хлопец хадзіў у беларускамоўны дзіцячы садок і меў добрую выкладчыцу беларускай мовы ў школе. Таксама з дзяцінства захапляўся футболам. Свае інтарэсы спалучыў з цяперашняй прафесіяй.

«Сярод праграмістаў шмат людзей, зацікаўленых у беларускай мове і нацыянальных ідэях, — кажа Зміцер. — Думаю, больш, чым сярод іншых прафесіяў. Нават у карпаратыўнай сетцы маёй кампаніі ёсць суполка, дзе выкладваюцца пасты з мерапрыемствамі, скіраванымі на папулярызацыю беларускай мовы».

Над моўна-спартовым онлайн-праектам Зміцер працуе з двума сябрамі-праграмістамі, з якімі разам гуляе ў аматарскай футбольнай камандзе ў Мінскай лізе міні-футболу — iOS-распрацоўшчыкам Юрыем Найбічам і тэставальнікам Дзянісам Пархамчуком.

Ідэю хлопцы выношваюць яшчэ са старэйшых курсаў універсітэту.

Невядома, ці ўзяліся б яны за MovaCup сур’ёзна, калі бы не конкурс сацыяльна значных праектаў для Беларусі Social Weekend. Пераможцы конкурсу атрымліваюць грашовы прыз на рэалізацыю свайго праекту, а таксама ментарскую дапамогу.

Першы раз MovaCup выстаўлялася на Social Weekend летась. Тады праект прайшоў незаўважаным. Аднак сёлета яго падтрымала журы, і онлайн-гульня трапіла ў фінал, дзе атрымала 20-мільённы прыз і бясплатны хостынг ад Hoster.by.

Выйграныя грошы і тое, што яны яшчэ збяруць на краўдфандынгавай пляцоўцы «Улей», хлопцы накіруюць на дызайн прыкладання для Android. Калі ж яны знойдуць дызайнэра, атрыманыя 20 мільёнаў пойдуць на маркетынг і раскрутку гульні. Акрамя дызайнера ім сёння бракуе яшчэ андроід-распрацоўшчыка.

«Усе мы валанцёры, і праект не задумваецца як камерцыйны, — кажа Зміцер. — Мы зыходзілі са сваіх інтарэсаў, а не з таго, што прыносіць грошы, што цяпер у трэндзе».

Перакладаеш словы — забіваеш гол

Агульны сэнс гульні ў тым, што чалавек адкрывае онлайн-дадатак ці сайт, дзе трапляе на віртуальнае футбольнае поле. Каб наблізіцца да брамы суперніка (ім можа быць кампутар ці іншы карыстальнік), трэба правільна перакласці слова з расійскай мовы на беларускую. Складанасць словаў будзе залежаць ад абранага ўзроўню.

Цягнецца гульня 5 хвілін, на адказ даецца 10 секунд. Калі гулец адказвае на чатыры пытанні (праходзіць тры лініі абароны і брамніка), ён забівае гол. Калі не адказвае на некалькі пытанняў запар, прапускае ў сваю браму. У залежнасці ад выніку матчу гулец зарабляе свой рэйтынг.

У далейшых планах стваральнікаў MovaCup — онлайн-турніры. У абмежаваны час тады будуць праводзіцца гульні паміж карыстальнікамі ў турнірным парадку з узнагародамі для пераможцаў.

Пакуль у камандзе толькі тэхнары. Таму, каб напоўніць гульню словамі, хлопцы ўжо звяртаюцца да офлайн-курсаў. «Каб карыстальніку не траплялася адно слова двойчы, трэба закласці ў праграму вельмі шмат слоў», — кажа Зміцер.

Акрамя футболу, на MovaCup будзе адпачатку прынамсі яшчэ адзін модуль — гістарычная гульня «Веру — не веру». Гэтую ідэю падказалі ў журы Social Weekend. Адно за адным там будуць усплываць гістарычныя пытанні, і гульцу, каб прайсці далей, трэба будзе вызначыць, ці праўда гэта.

«Ні раней, ні цяпер такіх рэсурсаў у інтэрнэце няма. Калі чалавек сядзіць на працоўным месцы і мае пяць вольных хвілін, ён можа зайсці на MovaCup ды патыкаць у гульню, а не глядзець Youtube», — перакананы Зміцер.

На сайце movacup.by ідзе адваротны адлік да запуску онлайн-гульні. Пакуль задумваецца запусціць яе 1 сакавіка 2016 году.

Помогаете devby = помогаете ИТ-комьюнити.

Засапортить сейчас.